SSH og Sorpa bs. hlutu Teninginn

Samtök sveitarfélaga á höfuðborgarsvæðinu (SSH) og Sorpa bs. hlutu Teninginn, viðurkenningu Verkfræðingafélags Íslands fyrir framúrskarandi verkefni eða framkvæmd, fyrir samræmt flokkunarkerfi úrgangs á höfuðborgarsvæðinu. Teningurinn var afhentur á Degi verkfræðinnar á Hilton Nordica í föstudaginn 28. mars 2025.

„Hlutverk Sorpu er að annast meðhöndlun úrgangs og sinna þannig lögbundinni skyldu sveitarfélaganna sem að fyrirtækinu standa. Mikilvægt umbótaverkefni var að innleiða samræmt flokkunarkerfi á höfuðborgarsvæðinu. Verkefnið fólst í að koma á sérsöfnun og flokkun heimila á úrgangi sem er lykilþáttur í innleiðingu hringrásarhagkerfis. Í upphafi verkefnisins voru úrgangsflokkarnir fjórir en við lok þess árið 2024 flokka heimili á höfuðborgarsvæðinu úrgang í átta flokka,“ segir í rökstuðningi dómnefndar.

„Með sérsöfnun á matarleifum var stigið stórt skref í samdrætti á losun gróðurhúsalofttegunda á Íslandi. Mælingar á magni matarleifa í blönduðum úrgangi og hreinleiki matarleifa sýna að algjör hugarfarsbreyting hefur orðið hjá íbúum. Með skýrum skilaboðum náðist að breyta viðhorfum hvað varðar hlutverk einstaklinga og heimila í því að draga úr umhverfisáhrifum úrgangs.“

Árangur verkefnisins fór fram úr bæði markmiðum og björtustu vonum hvort sem litið er til hugarfarsbreytingar, breyttrar hegðunar eða jákvæðra áhrifa á bæði heildarmagn úrgangs frá heimilum, magni flokkaðs úrgangs, endurvinnsluhlutfalls, hreinleika eða skilvirkni flokkunar.

„Innleiðing hringrásarhagkerfis er ein öflugasta aðgerð gegn loftslagsbreytingum. Það hefur mikla þýðingu í að bæta hagkerfið, leiða það í átt að sjálfbærni og betri nýtingu á auðlindum,“ segir umsögn dómnefndar.

„Góðan árangur verkefnisins má ekki síst þakka stýrihópi sem undirbjó verkefnið og var skipaður tæknimenntuðu fólki sem starfar hjá Sorpu bs. og sveitarfélögunum sem að fyrirtækinu standa."

Viðstaddir talið frá vinstri: Svana Helen Björnsdóttir formaður verkfræðingafélags Íslands, Ásdís Ólafsdóttir svæðisskipulagsstjóri höfuðborgarsvæðisins frá SSH, Jón Viggó Gunnarsson framkvæmdastjóri Sorpu bs., Gunnar Dofri Ólafsson frá Sorpu bs., Ísól Fanney Ómarsdóttir frá Sorpu bs., Birkir Rútsson frá Kópavogsbæ, Guðmundur B. Friðriksson frá Reykjavíkurborg, Friðrik K. Gunnarsson frá Reykjavíkurborg, Valgeir Páll Björnsson frá Sorpu bs., Tómas Guðberg Gíslason og Katrín Dóra Þorsteinsdóttir frá Mosfellsbæ.

Svana Helen Björnsdóttir formaður Verkfræðingafélags Íslands afhenti Teninginn. Jón Viggó Gunnarsson framkvæmdastjóri SORPU bs. tók við gripnum og með honum var starfsfólk fyrirtækisins og sveitarfélaganna og svæðisskipulagsstjóri höfuðborgarsvæðisins.

Verkefnið var hluti af sóknaráætlun höfuðborgarsvæðisins 2020-2024 og var SSH því í stóru hlutverki við innleiðingu þess. Jón Kjartan Ágústsson fyrrverandi svæðisskipulagsstjóri höfuðborgarsvæðisins var fulltrúi SSH í verkefnahóp verkefnisins, en hann samanstóð af góðum hópi tæknimanna sveitarfélaganna og starfsfólki Sorpu bs.

Um Teninginn
Markmið Teningsins er að vekja athygli á vel útfærðum og áhugaverðum verkefnum sem verkfræðingar og tæknifræðingar vinna að. Viðurkenningin er veitt fyrir verkefnið í heild og er það eigandi (bakhjarl) verkefnisins sem hana hlýtur. Verkefni sem eru tilnefnd geta verið af ýmsum toga, til dæmis framkvæmdaverkefni, nýsköpunarverkefni, hugbúnaðarverkefni eða umbótaverkefni. Hönnun Teningsins byggir á þrettán teningum sem allir styðja við hvern annan og snúast eftir formúlu Theódórusar, grísks stærðfræðings, eða svo kölluðum Theódórusarspíral.