Útivistarvefur höfuðborgarsvæðisins

Verkefnið fól í sér að setja á laggirnar vef sem veitir upplýsingar um helstu útivistarsvæði á höfuðborgarsvæðinu, þ.á.m., innviði sem þar er að finna, tækifæri fyrir tómstundir, leiki, afslöppun og samgöngutengingar.

Útivistarvefurinn er hluti af sóknaráætlun höfuðborgarsvæðisins fyrir árin 2020-2024 þar sem heilnæmt umhverfi og heilbrigt líf er haft að leiðarljósi.

Opnaður hefur verið vefurinn ÚT UM ALLT.

 

 

 

• Á vefnum Út um allt, utumallt.is, má finna yfir 30 útivistarsvæði og 40 göngu- og hjólaleiðir um allt höfuðborgarsvæðið, og mun bætast í eftir því sem vefurinn þróast.
• Vefurinn er einfaldur í notkun og sýnir staðsetningu notanda á korti í rauntíma.

 

Út um allt, nýr upplýsingavefur um útivistarmöguleika á höfuðborgarsvæðinu, var formlega tekinn í notkun á fundi stjórnar Samtaka sveitarfélaga á höfuðborgarsvæðinu (SSH), mánudaginn 3. febrúar. Á vefnum utumallt.is er að finna yfirlit og upplýsingar um yfir 30 skemmtileg útivistarsvæði og 40 kortlagðar göngu- og hjólaleiðir, vítt og breitt um höfuðborgarsvæðið. Leiðum fylgja gagnlegar upplýsingar, til að mynda um erfiðleikastig og tímalengd, og getur notandi jafnframt séð eigin staðsetningu á korti og fylgt leið í rauntíma. Á síðunni er góð leitarvél og hægt er að sía eftir ýmsum breytum á borð við sveitarfélag, aðstöðu, þjónustu og aðgengi. Vefurinn, sem er bæði á íslensku og ensku, er samstarfsverkefni SSH og Markaðsstofu höfuðborgarsvæðisins.

Aukin hreyfing og nýting á grænum svæðum
„Eitt af leiðarljósum sóknaráætlunar höfuðborgarsvæðisins er að stuðla að heilnæmu umhverfi og heilbrigðu lífi. Í því ljósi ákváðum við að þróa og setja upp vandaðan útivistarvef sem gefur yfirsýn yfir þá fjölbreyttu útivistarmöguleika sem höfuðborgarsvæðið býður upp á. Þeir verða þannig bæði sýnilegri og aðgengilegri fyrir íbúa. Við vonumst innilega til að vefurinn stuðli að aukinni hreyfingu, ánægju og nýtingu á grænum svæðum.“ segir Páll Björgvin Guðmundsson, framkvæmdastjóri SSH. Páll Björgvin bendir á að Út um allt tengist fleiri verkefnum sem stuðla að markmiðum sóknaráætlunarinnar, til að mynda Kortlagningu útivistarsvæða á höfuðborgarsvæðinu sem lauk árið 2023. Vefurinn er einnig tengdur samgöngusáttmála höfuðborgarsvæðisins og þeirri umfangsmiklu uppbyggingu hjóla- og göngustíga sem þar er kveðið á en síðan er hönnuð til að nýta hjóla- og göngustíganet höfuðborgarsvæðisins til framtíðar.

Ljósmynd tekin í Fossvogsdalnum af Ingu Hlíin Pálsdóttur framkvæmdastjóra Markaðsstofu höfuðborgarsvæðisins og Páli Björgvini Guðmundssyni framkvæmdastjóra SSH

Mikið samráð og þarfagreining
„Þetta hefur verið einstaklega skemmtilegt verkefni í þróun og hafa m.a. sjálfboðaliðar tekið þátt í kortlagningu slóða. Má sérstaklega nefna hjólreiðasamtökin Reiðhjólabændur sem merktu og skráðu fyrir okkur hjólaleiðir og flokkuðu eftir erfiðleikastigi og færum við þeim bestu þakkir“ segir Páll Björgvin.

Út um allt hefur verið tæp tvö ár í undirbúningi. Ráðist var í djúpa þarfagreiningu og var samráð haft við íbúa, sveitarfélögin, ferðaþjónustuna og aðra hagaðila á höfuðborgarsvæðinu, enda mikilvægt að vefurinn sé sniðinn að þörfum notenda. Vefurinn byggir á miðlægu skráningarkerfi og gagnagrunni Ferðamálastofu sem heldur utan um gönguleiðir og útivistarsvæði um land allt. Fyrirtækið Sjá - óháð ráðgjöf sá um undirbúning og þarfagreiningu en fyrirtækið Um að gera sá um hönnun og smíði.

„Við munum nú halda áfram að þróa Út um allt og bæta við leiðum og skemmtilegum svæðum. Við hvetjum alla til þess að nýta sér vefinn og fara út og njóta náttúrunnar sem umvefur höfuðborgarsvæðið“ segir Inga Hlín Pálsdóttir, framkvæmdastjóri Markaðsstofu höfuðborgarsvæðisins.

 

 

8. maí 2024

 

Framkvæmdastjóri Um að gera ehf. og framkvæmdastjóri SSH undirrituðu þann 8. maí 2024 verksamning um hönnun, smíði og uppsetningu á Útivistarvef höfuðborgarsvæðisins.

Vefnum er ætlað að gera útivistarmöguleika sýnilegri fyrir íbúa og gesti svæðisins og hvetja til aukinnar notkunar og áhuga á útivistarssvæðum, afþreyingarmöguleikum og annarri þjónustu.

Við sama tilefni undirrituðu Inga Hlín Pálsdóttir framkvæmdastjóri Markaðsstofu höfuðborgarsvæðisins og Páll Björgvin Guðmundsson framkvæmdastjóri SSH samkomulag um rekstur vefsins og áframhaldandi þróun hans innan markaðsstofunnar.

Samkvæmt Páli Björgvini verður útivistarvefurinn mikið framfaraskref fyrir íbúa og gesti höfuðborgarsvæðisins. ,,Hugmyndin er sú að útbúa einfalda síma- og veflausn til að bæta upplifun íbúa og gesta þegar þeir njóta hinna fjölmörgu útivistarsvæða, göngu- og hjólastíga sem er að finna á höfuðborgarsvæðinu öllu. Vefurinn verður þannig uppbyggður að á einfaldan hátt verður hægt að velja úr fjölda áfangastaða og rafrænna leiðarvísa um göngu- og hjólastíga að þeim.

Við bindum miklar vonir við þennan vef sem er eitt af þessum sameiginlegu verkefnum sveitarfélaga á höfuðborgarsvæðinu sem gera svæðið í heild enn betra og skemmtilegra til búsetu.”

Páll Björgvin Guðmundsson framkvæmdastjóri SSH, Hilmar Kári Hallbjörnsson framkvæmdastjóri Um að gera ehf., Jóhanna Símonardóttir ráðgjafi Sjá ehf., Inga Hlín Pálsdóttir framkvæmdastjóri Markaðsstofu og Jón Kjartan Ágústsson svæðiskipulagsstjóri höfuðborgarsvæðisins.